“Cada barco de emigrantes que partía estremecía momentáneamente as entrañas da comunidade social, coa dor aguda dun esgazamento, dunha brusca separación, dunha amputación violenta”

As causas que levaron a milleiros de persoas a abandonar a súa terra foron diversas: a fame, a miseria, os desexos de mellorar ou as ansias de vivir unha aventura. Pero é nos anos 30 e principios dos 40, cando se produce un tipo de emigración diferente, o chamado exilio político. Foron estes exiliados os que mantiveron viva a nosa lingua e as nosas costumes alén dos mares e continuaron espallando a cultura que aquí nos foi prohibida.

Grazas a eles e ó labor que desenvolvían a través das sociedades que formaron, Galicia non deixou de ter identidade propia. Na Federación de Sociedades Galegas da Arxentina está o Museo da Emigración Galega (MEGA) que conserva documentos imprescindibles para escribir as páxinas da nosa historia contemporánea.