Pese á crise, ás trabas dos concellos e a dificultade de atopar un solar baleiro para instalar a súa carpa, os compoñentes do circo Richards Bros siguen na súa andadura. Unha mistura entre circo tradicional e moderno que incorpora novidades técnicas ás de outrora, tal como pista elevada, modernidade e innovación das luces láser, son estéreo ou efectos especiais.

A familia Richards, cuarta xeración de circo, decidiu crear algo diferente despois de case unha década xestionando unha exposición itinerante de animais. “Cando deixamos Expoanimalia, decidimos voltar á orixe, pero facendo algo diferente aos demais”. Así de rotundo se expresa Sandro Richards, director do circo, convencido de rachar cos límites preconcebidos nesta anciana arte. “Antes de abrir o circo, percorrín centos de espectáculos, e vin sempre o mesmo, sen innovación algunha”. Quizais por ese motivo,e malia defender os animais-artistas, decidiron prescindir de tigres, elefantes ou leóns, e o único número desta nova producción onde podemos deleitarnos coas criaturas, sexa o dos cans amaestrados.

Pero non é o único. Durante dúas horas de función, cos seus correspondentes quince minutos de descanso, o público poderá rir, gozar e aplaudir diante de contorsionistas, trapecistas, magos e pallasos, que xurdirán na pista logo de que un pequeño clown fique durmido na pista. Na súa ensoñación, a boneca de trapo coa que xoga convírtese en persoa, e con ela percorre a fantasía do circo e dos seus artistas, ata que chega o día e o pallaso esperta.

“Quixemos prescindir de presentandor e dárlle protagonismo a función en si mesma, contar unha historia” afirma Sandro, superando a faceta do circo como simple espectáculo familiar para chegar a público máis maior, nomeadamente universitarios.

Pero ainda que o Richards Bros recree un mundo afastado da realidade, sufre como todos os problemas do día a día. A crise inflúe e por iso din traballar ao mesmo prezo que hai catro anos. Pese a todo, o público sigue sen ser o esperado, e agardan que repunte a partir da primavera, cando a xente está máis animada para saír da casa. Aínda así, Sandro, que codirixe o espectáculo xunto o seu irmán, comprométese a seguir loitando por sacar adiante o seu soño, xa que, segundo el mesmo recita “Eu non fago circo para facerme rico, quérome facer rico para facer circo”.

Chegaron a Galiza logo dunha longa estancia en Portugal. Debutaron no Porriño e ata a semana que vén estarán en Vigo. Logo Vilagarcía e outras cidades (entre elas Compostela). Quen desexe acudir ao espectáculo deberá saber que os prezos oscilan entre os 10 e 25 euros e que, unha vez dentro, tal e como afirma o locutor “está permitido rir, emocionarse, aplaudir e soñar”.